Loading...

Thursday

Tips Para Iwas Sleep Disorder


Mahalaga ang pagtulog dahil kinakailangan ito ng ating katawan para makapag-reserba ng lakas para sa araw ng bukas. Mapapansing kapag kulang sa tulog ang isang tao ay ‘di rin maganda ang performance nito sa pag-aaral, trabaho o sa kung ano pa mang bagay. Kaya’t mahalaga talaga ang pagkakaroon ng sapat na tulog. Inirerekomenda ng mga duktor na matulog ng walong oras kada-gabi. Ngunit nakadepende na rin ito sa kung ano’ng edad mayroon ang isang tao.

May mga bagay na nakaaapekto sa kalidad ng ating pagtulog. Ilan na rito ay ang pag-inom ng alcohol. Bagama’t nakakapagpatulog nga ito ay ‘di naman maiiwasan na magigising ka sa dis oras ng gabi kaya’t maiistorbo rin ang pagtulog. Kapag naparami pa ng inom ay siguradong maya’t maya ay panay ang ihi.

Siyempre pa, kapag uminom ng kape sa hapon o ‘di kaya’y sa gabi ay siguradong mahihirapang matulog dahil na rin sa caffeine na taglay nito. Nagsisilbi kasi itong hadlang sa adenosine, parte ng neurotransmitter na tumutulong para sa pagkakaroon ng magandang tulog. Huwag ding uminom ng mga energy drink kapag malapit ng matulog. Bagay lang ang ganito sa mga taong ang trabaho ay sa gabi, para manatili silang gising, ika nga.

Iwasan din ang makinig ng radyo habang natutulog. May mga tao kasi na ito ang ginagawa nilang pampatulog. Oo nga’t makatutulog, pero dapat din namang isipin ang mga kasamahan sa bahay o ‘di-kaya’y kapitbahay na ‘di sanay sa ganitong sistema. Isa pa, siguradong maalimpungatan din dahil sa tunog ng radyo. Mainam pa rin talaga ang tahimik na paligid para maging mahimbing ang tulog.

Siguraduhin ding komportable ang iyong tulugan. Kapag mainit ay siguradong mahihirapang matulog. Electric fan lang naman ang kapatat nito. Para maging presko rin ang pakiramdam ay magsuot ng komportableng damit. 

Para maging maging maayos ang pagtulog ay ugaliin ding mag-ehersisyo para manatiling malusog ang katawan. Huwag nga lang mag-i-ehersisyo bago matulog dahil siguradong magiging aktibo pa ang iba’t ibang parte ng iyong katawan. Ini-rekomenda ng mga eksperto bukod sa pag-i-ehersisyo sa umaga, mainam ding mag-ehersisyo tatlo o apat na oras bago matulog.
Loading...