Loading...

Thursday

LA 105, Naalala Mo pa ba?


            Kung batang 90’s ka at mahilig sa alternative music, malamang ay nakikinig ka rin sa LA 105.9. ito lang ang nag-iisang FM radio na nakalaan para sa mga alternatibong musika. Bagama’t andun ang NU 107 na puro rock music din ang pinapatugtog. Ang pinagkaiba lang nila, ang isa ay pang-masa at ang isa naman ay para sa mga coño. Kada-alas dose ng tanghali ay nagpapatugtog ang LA 105 ng puro Pinoy rock. Kada-Linggo naman ay mayroon pa silang countdown kung anong kanta ang naging paborito ng mga listener sa loob ng isang linggo. Minsan nga ay nag-iimbita pa sila ng banda para tumugtog ng live o ‘di kaya’y para kapanayamin para makapag-promote sila ng kanilang album o ‘di kaya’y gig.

            Marami ring ipinakilalang mga banda ang istasyong ito. Ang maganda rito, kahit ano’ng klase ng musika ay kanilang pinapatugtog. Mapa-folk song, reggae, ska, punk, hardcore, death metal at kung anu-ano pa. Ikaw na lang ang bahalang mamimili kung ano ang pakikinggan mo. Siyempre, ang maganda ay suportado ng LA 105 ang mga bandang Pinoy. Dito muna pinatugtugtog ang kanta ng mga sumikat na banda gaya ng Eraser Heads, Parokya ni Edgar, The Teeth, The Youth, Yano, Wolf Gang at iba pa bago sila pumalaot sa mainstream music. Bukod sa mga ito, dito mo rin maririnig ang mga bandang The Wuds, Philippines Violators, Datu’s Tribe, Warlock, Re-Animator, Dead Nails, Tribal Fish at napakarami pang iba. Malamang sa hindi ay may mga naging paborito kang kanta na pinapatugtog sa istasyong ito.

            Ito ang panahon kung saan sari-saring tema ng kanta ang iyong mapapakinggan at hindi lang puro love song gaya ng sa mainstream music. Malayang naipapahayag ng mga musikero kung ano ang kanilang saloobin sa iba’t ibang bagay, mapa-pulitika man o pananaw sa buhay o mapa-simpleng kalokohan man. Bakit hindi ito mangyayari, eh walang nagdidikta sa kanilang producer kung ano ang dapat nilang kantahin o sulatin? Ibang-iba talaga ang eksena noon kumpara sa ngayon. Bagama’t mayroon pa namang mga banda, hindi na ito kasing sigla gaya noon na talagang nagkaroon ng bandwagon dahil sa LA 105. Nakapag-prodyus pa nga ang istasyon ng compilation album ng kanilang mga talent at nakapagbukas pa ng music bar sa Tomas Amoranto na mismong nakapangalan sa istasyon.

            Sayang nga lang at nagpalit format ang pamunaang ng istasyong ito. Ni wala nang bakas kung ano sila noon. Bagama’t wala na ang LA 105 ay ‘di maikakaila na naging matindi ang kontribusyon at impluwensya nila sa larangan ng musika. Nakatatak na sa puso’t isipan ng mga naging taga-pakinig ang mga kantang kanilang pinapatugtog...
Loading...