Loading...

Thursday

Debate sa Luneta


        Tuwing Lingo ng gabi ay nagkakaroon ng impormal na debate sa may Luneta. Hindi malaman kung kailan ito nag-umpisa basta nakagawian na lang ito ng mga nagpupunta dito. Ito ay bukas sa publiko, kahit sino ay puwedeng sumali basta kaya mong sagutin ang argumento ng nanghahamon. Sa pormal na debate mayroong panelista, may oras kung hanggang kailan dapat magsalita at merong cross examination para mapuntirya ang kahinaan ng katuwiran ng katalo. Pero dito sa debate sa Luneta puwede kang magsalita at sumagot nang hindi nililimitahan at puwede ring sumingit ang iba hanggang sa ito na ang maging kadebate ng isa. Pero kahit ganito pa ang sistema, ang nakatutuwa ay 'di ito humahantong sa pisikal na away at murahan. Nauunawaan ng mga kalahok at mga nakikinig na palitan lang ito ng kuro-kuro at walang personalan.

     Samu't saring paksa ang dito ay tinatalakay, mapa-kasaysayan, pulitika, relihiyon at iba pang puwedeng pagtalunan. Dito mo maririnig ang opinyon ng mga ordinaryong tao tungkol sa mga isyung napapanahon. Mapupulsuhan mo kung ano ang kanilang niloloob. Hindi man sila mga orador na matatalisik magsalita ay marunong din silang mangatuwiran at magsuri sa lipunan. Kahit pa may halong kapilosopohan ang isinasagot ng iba. Makikita mo kung gaano sila katibay manghawak sa kanilang pinaniniwalaan.

      Naalala ko nang minsan nakapanuod ako ay puro matatandang kalalakihan ang nagdedebate. Sa umpisa ay kasaysayan ng Pilipinas ang kanilang pinagtatalunan hanggang mapunta na sa kasaysayan ng mundo. Nakaaaliw ang kanilang mga kuro-kuro animo'y mga iskolar ng lansangan mangusap. Hanggang sa mabaling ang paksa sa relihiyon, pinagtalunan nila kung mayroon bang Diyos o wala? Ang isang matanda ay hindi naniniwala na may Diyos dahil para sa kanya ay utak daw ng tao ang nagpapatakbo sa lahat ng bagay. Wala raw mapapala sa pagbabasa ng Biblia dahil nakakasira lang daw ito ng ulo. Natural kontra ang lahat hanggang sa masukol siya sa kanyang pangangatuwiran. Kaya't sa pagkapikon ay tinapak-tapakan niya ang dala niyang maliit na Biblia. Kaya't lumabas tuloy siyang katawa-tawa at may saltik sa harap ng marami. Nagpapatunay lang ito na iba't ibang karakter ang sumasali sa impormal na debate sa Luneta. Kusa na lang tumitigil ang sagutan ng mga nagdedebate kapag nagsawa na sila at ipagpapatuloy uli sa susunod na Lingo.
Loading...