Loading...

Tuesday

Aldub Versus Pastillas Girl, Sino'ng Bet Mo?

  
          Dahil sa biglang pagsikat ng tambalang Aldub ng Eat Bulaga ay mukhang naungusan nang husto ang kalabang programa nito na Show Time. Noong una ay itinapat nila si Ryan Rems na naging champion ng isa isa nilang pa-contest- ang the Funny One. Pero ‘di nito kayang tapatan ang magic ng Aldub. Ngayon naman ay itinatapat nila si Angelica Jane Yap o mas kilala sa tawag na Pastillas Girl na naging viral online dahil sa kanyang video na nagtuturo kung paano gumawa ng Pastillas recipe na inuugnay sa pag-ibig.

            Umani ng reaksyon mula sa netizens ang paglabas ni Pastillas Girls sa Showtime. Sa programa pa kasi niya hinahanap ang kanyang Mr. Pastillas. Ayon sa mga fans ng Aldub ay desperado na diumano ang Showtime dahil sa hakbang nilang ito. Ang pag-ibig diumano sa Aldub ay actingan lang at ang pag-ibig ay hinihintay sa tamang panahon. Samantalang si Pastillas Girl ay sa Showtime pa hinahanap ang kanyang Mr. Pastillas. Mistula diumano itong ibinubugaw ng naturang programa. Hindi rin nagustuhan ng iba ang paraan ng pagsikat ni Pastillas Girl dahil nakilala ito dahil sa lakas niyang magmura at hindi dahil sa mayroon itong talento. Hindi raw siya magandang ihemplo sa mga kabataan.

            Kasalukuyan ding inuulan ng batikos si Pastillas Girl dahil napag-alaman na ang kanyang pastillas recipe ay kinopya lang niya sa isang FB user na nagngangalang Meil Francisco. Nag-post na ng rekasyon ang nasabing orihinal na gumawa ng pastillas recipe. Sinabi nito na ibinibigay na niya sa nangopya ang recipe niya. Inamin naman naman ni Pastillas Girl na hindi nga sa kanya ang recipe. Ginawan niya lang ito ng video. Gusto niya sanang i-credit sa may-ari, pero ‘di niya kilala. Marami na rin kasing mga nag-share nito sa Facebook bago niya gawan ng video.

            Sa kabilang banda, ipinagtanggol naman ng mga maka-Show Time sa mga basher si Pastillas Girl. Bakit daw masyadong war freak ang mga Aldub fans? Gayung pareho lang namang gustong makapagpasaya ng mga tao ang Show Time o Eat Bulaga. Eh, ano kung nagmumura si Pastillas Girl, ibig bang sabihin nito ay masama na siyang tao? Tungkol naman sa pangungopya nito ng recipe, wala naman daw sinasabi si Pastillas Girl na sa kanya nga ‘yun. Sana gumawa rin ng video ang may-ari nito para siya ang sumikat at hindi si Angelica Jane Yap.

            Sinasabi rin ng mga fans ng Show Time na hindi naman lahat ng tao ay natutuwa sa Aldub love team na wala namang ginawa kundi ang magpa-bebe wave o ‘di-kaya’y ang pagda-Dubmash. Eh, ano rin kung ito ang kauna-unahang kalye serye sa bansa? Wala silang pakialam kung sinasabi man ng iba na pumatok ito dahil nakaka-relate ang marami rito. Na maaaring ibigin ng isang prince charming ang simpleng babae lang kagaya ni Yaya Dub. Pero sa kabilang banda, tinatanggap nila na phenomenal nga ang Aldub, pero saan nga ba at huhupa rin ito. Hiling lang nila, sana ay tigil-tigilan na sila ng mga Aldub fans na mahilig magkumpara sa Show Time at Eat Bulaga.

            Kung iisipin, bakit nga ba kailangang mag-away din ng mga fans ng magkalabang programa? Ang labanan ay hindi na lang nila ipaubaya sa magkabilang istasyon. Mukhang mas mainit pa sa tunggalian ng mga magkakalaban sa pulitika. Eh, isa lang naman itong uri ng entertainment. Kaya’t huwag masyadong pakadibdibin ‘ika nga. Kung tutuusin ay kanya-kanya lang naman ng trip ‘yan. Alam naman natin na sina Maine Mendoza at Pastillas Girl ay likha ng social media na pareho nang pinagkukunan ng mga talent ng giant network sa bansa. Sa huli, nasa atin din naman ‘yan kung sino ang panunoorin natin o hindi. Kaya’t sa mga fans ng Aldub at ng Pastillas Girl, KALMA lang!


Loading...